開虛擬銀行戶口，可享11% Apple服務簽帳回贈、20%Netflix/viu訂閱回贈等、5% foodpanda回贈。詳參：https://cuhkinfo.blogspot.com/2021/07/blog-post_26.html
「煤氣費單點解咁貴?」——好多人一收到張煤氣單就會問呢一句。其實有得解的。看本篇文章時，請保持清醒。因為若然你不清醒，睇左都冇用。
要知道煤氣費點解咁費，就要知道煤氣費單收既係咩錢。
煤氣費 ［包括
煤氣標準收費+
燃料調整費］
常見問題：點解要分開兩舊黎計？因為標準收費係每個月固定的，而燃料調整費會根據石腦油（咁上下）既價格黎變動。如果痴埋一舊黎出，就唔清楚，所以一定要斬開兩舊黎出。
保養月費 ［$9.5，每個月都要收］
常見問題：點解個個月都收我$9.5？其實諗落你係有賺的。俾完$9.5你就可以無限次call人上黎整爐。你而家是旦出去搵個師傅上黎幫你check 下，檢查費坐底就$100，維修、零件當然另計。而家$9.5包檢查、維修其實抵到爛。當然你唔洗check唔洗維修的話可能對你冇咩用，但你同買危疾保險一樣都求個保障，你會想自己一定有危疾先抵返嗎？可能你又會問，我中意每次比，唔得咩？仲咩焗我個個月都要比？煤氣呢家野同其他野唔同，如果壞，甚至漏氣係有機會有危險的，如果要你諗過度過，做完一輪決定先至報修，可能已經爆左。所以人地焗你比有佢原因的。
按金 ［公屋$300；其他$600。開戶時交一次，結戶時會退］
分期［買爐的話有時可選免息分期，分期就會入煤氣單收］
零件/工程費
覺得煤氣單貴時，唔好淨係睇個大數，要睇breakdown。好多時貴就貴在分期、零件費同工程費度，如果自己買過爐，做過工程的話，自己要心中有數。
———
睇到呢度，提提大家，繼續保持清醒。
「煤氣費」點解咁貴？
咁你就要知道有咩因素會影響煤氣用量。
1. 季節。冬天一定比夏天用得多煤氣（所以煤氣費會貴。）
原因：冬天氣溫本身低，水管入水的溫度會低過夏天。假設：
冬天室溫 12度 -> 水溫應該差唔多都係12度 -> 你開37度的水 =>升溫 25度
夏天室溫 25度 -> 水溫應該差唔多都係25度 -> 你開37度的水 =>升溫 12度
在同樣的時間之下，要令d 水升溫25度所用既煤氣，係一定會比升溫12度所用既煤氣多。而且係會多好多，升既溫度多一倍，用既煤氣雖然未必多足一倍，但多50%-70%其實好合理。唔信你自己睇下，你每年12月-2月d煤氣用量係咪特別多？
2. 你用緊咩爐。呢度主要講熱水爐，唔講煮食爐，點解？下面會講。
用出水量高既熱水爐，用既煤氣一定會多過出水量低既熱水爐。
煤氣熱水爐係即熱式的，即係佢每一分鐘會出水若干公升（而唔係儲水式）
假設你用緊隻16公升既熱水爐，即每分鐘出水16公升。
對比你用緊隻6.8公升既熱水爐，即每分鐘出水6.8公升。
邊部用煤氣用得多d呀？呼之欲出啦。
另外，要留意你係咪用緊d有pre-heat功能既熱水爐。
點先叫做pre-heat功能既熱水爐？一般煤氣公司d model有個Q字個d就係，例如咩咩咩TFQL個d.... 不過其實除非你係有錢仔（呢d爐唔平），定係真係屎忽痕（冇事冇幹買咁貴既爐把鬼?）先會主動買呢d爐.....
不過呢d爐有好多都係隨樓附送的。（想知自己係咪用緊呢隻爐？好簡單，睇下你d panel有冇pre-heat呢個button，有就係）
點解用呢d爐煤氣費會咁貴呢？全因為pre-heat呢個button，呢個button 你一按落去，即使冇用熱水，佢都仲係會幫你熱著d水，以備你隨時使用。個原理就同你去某d高級中菜廳，佢兜茶下面會有個爐仔燒著，令兜茶唔會凍。只不過中菜廳用既係蠟蠋，而煤氣爐用既係煤氣。咁你而家大概可以理解到點解煤氣費會貴。
一般開煤氣既師傅都會同客講呢樣野，而且好多時都會幫你關左先。但有時屋企人按到，或者你搵agent開門，agent冇話你聽師傅同佢講左d咩，咁就出事。
3. 使用習慣其實廢話。你屋企有幾多人？你地一日沖幾多次涼？每次沖涼幾耐？沖得多沖得耐當然用既煤氣就會多。
4. 讀數？拎黎計單既讀數係咩讀數？估計讀數？抄錶讀數？報錶讀數？
如果係估計讀數：去睇下個錶啦，睇下有冇估大到。有就打去熱線改單。
如果係抄錶讀數：有機會你之前長期冇報錶，所以有人抄錶之後，同你adjust番個數。而個個數唔係你一個月用既煤氣，而係低估期間既煤氣用量。假設，你2年冇報錶，每個月估少你3度，3度X24個月 = 大約一千大洋。抄錶員上門抄好少會抄錯，不過你都可以去睇下個錶。錯左就約人上黎抄過。
如果係報錶讀數：去睇下個錶，有冇報錯。另外，有d 人亂報錶都可能會出問題。例如加價前執輸行頭，慘過敗家地一報報左500度，咁之後d單d數就會亂......出左問題，鬼叫你亂報咩。
*點解唔講煮食爐？因為用唔用煮食爐其實分別不大。好多人成日問，點解我冇用煤氣煮食，都要比咁貴煤氣？但其實就算你一日煮十餐都好，用既煤氣都唔會多。點解呢？想像一下：
煮食爐煲水，你開一煲室溫的水，用大火要煲到37度，要幾耐？起碼2分鐘。
熱水爐沖涼，每一秒鐘都有37度既熱水出緊，你就可想而知熱水爐既火力比煮水爐大好多好多倍。
而且要留意既係，煮食爐你會開大火開幾耐？煮一餐，我估最多咪開十分鐘，咩都夠。你唔會開夠半個鐘，一個鐘的，因為如果你咁樣煮法只會有兩個結果，一係燶，一係燒左間廚房。咁所以睇到呢度你要明白點解冇用煤氣煮食，但好似冇咩變動。
還清醒嗎？睇到呢度，我唔希望會聽到你問：我屋企三個人，我朋友屋企五個人，點解我用既煤氣費仲貴過佢呀？
不過如果你真係想問，我都會答埋你：你屋企用咩爐呀？人地屋企用咩爐呀？你屋企一人沖幾多次涼？人地呢？沖一次涼要搞幾耐？人地呢？
當然會有人會信心滿滿地話自己沖一分鐘就可以出黎。咁我就真係要恭喜你，因為你可以去申請世界記錄。
———
常見問題：
1. 點解一下就收我480度，要百幾蚊，我邊有用咁多？
首先你要搞清楚一樣野，度數同MJ兆焦耳既分別。度數係要換算做兆焦耳先可以計到煤氣費。1度 = 48兆焦耳。所以你張要交百幾蚊既單，係480兆焦耳（=10度），而唔係480度。都話睇單要清醒d架啦。
480度煤氣要交六千幾的
2. 點解保養月費收左我百幾蚊？
我建議你拎把間尺間著黎睇，同埋保持清醒。
3. 點解一張單收我兩個月？我明明張張單都有交？
煤氣單default 係兩個月出一次，所以有兩個月既數係好正常的。
4. 如果煤氣費真係突然貴左好多，而屋企既用煤氣習慣（熱水爐）冇變，而你又有按時報錶的話，咁一般原因有兩個：
漏氣：不過通常漏左你會聞到。有懷疑就要盡早報檢查。
錶有問題：搵人上黎驗錶，不過會收你$50，check到有問題就免收，而且會trace番以往六個月既數黎調整。不過我既意見：除非條數真係好離譜（差四位數或以上），否則要驗錶其實唔係好化算。點解？以後再講。
5. 仲係唔明？
清醒地睇完一次都唔明，咁就清醒地打上熱線問喇。
